Ando aktujeli ardipe la sendungatar Roma sam, i Renate Holpfer pedar lakero but berschengero phandipe uso Romengero khetanipe vakerel. La ando bersch 1961 Ujvarate upro them ali suditiki burgenlanditika, imar ande lakero tschavoripe erschti kontaktscha Romenca sina taj lengero khetanipeskero entviklinipe sajt oja cajt barikane vodintscha.

Angle 31 berscha use jek bibastalo atentato Erbate, schtar Roma murdarde ule. Uso sako berschengero gondolipeskero mulatintschago, organisirim la Romengera pastoraltar la diöcesejatar Tikni Martona, upro opfertscha pal gondolim ol.

Ande amaro sendungakero redo „Naschade Romengere sidlungtscha le Burgenlandistar“ akan o reporteri Adi Gussak upro jomakero rodipe ando gav Lackenbach pe kerel. Odoj resel te le phure biro Heinrich Dorner, savo ande Lackenbach upre bartschino.

I Eva Schwarzmayer Rochoncate upro them ali taj upre bartschini. Vasch lakere familijakere khetan phandliptscha, kesdinel lakero donde bescharipe la dschidovtschengera historijaha lakere hajmatakere gavester taj le holocaustiha, imar ande lakero ternipe.

Ande amari adiveseskeri sendung phukavas le mulatintschagostar „Betschitiki dschili resel Gypsy Swing“. But barikaniptscha la betschitika muschikakera scenatar adale kiratiske te schunel taj te dikel sina. Bulhardo ulo o mulatintschago jeke genipeha le Rubino Reinhardtistar.

I andar i Tschechija ali taj sajt but berscha andi Austrija dschivdi pisimaschkija i kenva „Loschande pamaristscha jeka latscha ratake“ ar del. O historiji asajipe te anen, o vodschi aun te astaren taj o pharo sako diveseskero dschivipe eknaj pobisterdo te muken. Lakere pamaristscha na vakeren tschak le ternen aun, on te le phuren aun vakeren, save meresch ande jek fantasijakero them ande usinen.

Micindo taj but soraha sikatscha o Seimen Mettbach leskeri muschika uso Sintijengero kulturakero di ando R&B farajn ando 7to betschitiko gemajndakero becirk. O dschilaschi taj pijanisto leskere dschilenca, i kultura taj ajgeni historiji ande jek barikano koja dschivdon kerel. Leskeri jekoschni ardschumintschagoskeri forma, jazz, swing, soul taj avre andfojiniptscha use jek barikano hango khetan phandel.

Ando bersch 1992 Romengere tschave taj tschaja andar o suditiko Burgenland ando thaneskero schtudijo Tikni Martona, i dschili „Amen sam Roma“ la akcijonake Udud ando schitiknipe dschilade. O Adi Gussak poar tschaven taj tschaja papal lakla, on imar bare hi, taj ov ada phuro uprelipe angle lenge kheltscha – kaj papal but palgondoliptscha dschangarde ule.